Наградени три идејни решенија за новата управна зграда на Општина Аеродром

Општина Аеродром ги награди првите три идејни решенија за проектирање на новата управна зграда на општината.

Комисијата, составена од претседателот проф. д-р Страхиња Трпески, членовите Дејан Чадиќ и Зоран Пауноски, ги избраа најдобрите три идејни решенија од вкупно 22, што пристигнаа на објавениот конкурс.

Овие три наградени решенија ќе добијат парични награди во висина од 300.000 денари за прво место, 100.000 денари за второ место и 50.000 денари за трето место.

„Општина Аеродром по 16 години постоење, конечно ќе добие своја зграда. Тоа е од исклучително значење затоа што со нејзината изградба веќе нема да се плаќа висок месечен наем, а исто така и аеродромци ќе добијат пристојни услови каде што ќе можат да ги добијат сите граѓански услуги. Зградата ќе биде нова препознатлива точка отворена за сите и ќе претставува нов дом на сите аеродромци“, порача градоначалникот на општината, Златко Марин.

Зградата, покрај административниот дел, ќе содржи и мултифунционален центар за собири на граѓани каде што ќе можат да се организираат средби, венчавки и друг тип културни настани, интрегрирана подрачна единица и други простории што ќе бидат отворени за граѓаните.