Лукашенко тврди дека нема намера да побегне од Белорусија

пред 3 години

Белорускиот претседател, Александар Лукашенко, нема намера да бега од земјата под притисок на опозицијата, рече тој за време на состанокот со вработените во Министерството за внатрешни работи, пренесува „Белта“.

„Ако некој мисли дека ќе се спакувам и ќе заминам… Видете, имало ситуации кога некој веројатно треперел. Но, тука има генерали кои цело време зборуваат со мене и видоа дека влакно на главата не ми мрда. Видете, сме имале и полоши времиња кога на улиците гореа автомобили, анархисти и ѓубриња од целиот свет доаѓаа во Белорусија во средината на 90-тите, има снимки. Тие се обидоа да упаднат во владата, да постават шатори на Октомврискиот плоштад. Сè уште се сеќавам на тоа. Го издржавме сето тоа“, рече Лукашенко.

Лукашенко предупреди дека со цел да се заштити земјата, ќе бидат мобилизирани сите постојни средства, вклучително и агенциите за спроведување на законот и војската.

„Сакам не само припадиците на полицијата, кои се присутни денес, туку и војската, исто така да разберат дека војната не е војна како што беше порано, која почнува со надворешна агресија. Секоја војна ќе почне однатре. Се подготвуваше во нашата земја, во секој случај. Значи, секој треба да разбере дека ќе мобилизираме сè што имаме за да ги заштитиме нашата земја, нашите семејства и нашите деца. Би сакал да го разберете ова“, рече тој.

Претседателот ја нарече ситуацијата на западната граница на Белорусија немирна.

„Овде на Запад е немирно. Она што ми го рече државниот секретар на САД, Мајкл Помпео, тоа е добро, го забележав тоа“, рече тој.

Претходно, американскиот дипломат го увери Лукашенко дека нема закана за Белорусија од НАТО. Сепак, Лукашенко изјави дека трупите на НАТО се во движење и немирни, што го поттикнало и тој да распореди дел од белоруската војска во близина на западната граница.

„Тие се смирија, разбраа дека не се шегуваме“, рече белорускиот претседател.

Белорусија ги одржа своите претседателски избори на 9 август. Според податоците на Централната изборна комисија, актуелниот претседател Александар Лукашенко доби 80,1 отсто од гласовите. Светлана Тихановскаја, која освои 10,12 отсто, одби да ги признае резултатите од изборите и ја напушти Белорусија.

Протести избувнаа во главниот град на земјата Минск и во неколку други градови по гласањето за претседател, што доведе до судири меѓу демонстрантите и полицијата. Крајниот рок за „Ултиматумот на народот“ од опозицијата истече во неделата на 25 октомври, а беше упатен до претседателот Александар Лукашенко од страна на сега веќе прогонетата поранешна претседателска кандидатка Светлана Тихановскаја. Барањата вклучуваа оставка на актуелниот претседател, ослободување политички затвореници и крај на насилството. Опозицијата ги повика работниците во индустриските претпријатија да почнат штрајк ако овие барања не бидат исполнети.

Scroll to Top