ВИДЕО: Уапсен сопственик на локал во кој полицијата затекнала Русинки и Украинки „на црно“

Полицијата откри 18 гости и 11 странски државјанки од Русија и Украина во угостителски објект во Охрид, кој работел и покрај претходно имал забрана и ставена пломба. Од извршената контрола денеска во 1:30 часот, дополнително е утврдено дека во објектот работи по 18.00 часот, спротивно на мерките за спречување на пандемијата со Ковид-19. Сите што биле затекнати во објектот се приведени.

– На 16.01.2021 во 01:30 часот од страна на Одделот за криминалистичка полиција – Сектор за недозволена трговија со дрога оружје и опасни материи во координација со полициски службеници од Одделот за специјални полициски операции и Државен пазарен инспекторат извршена е контрола во угостителски објект на улица „Железничка“ во Охрид, сопственост на Д.Т. (30) од Охрид, при што било утврдено дека објектот работи и покрај претходно изречената забрана за работа и ставената пломба на 06.01.2021 од страна на Државен пазарен инспекторат, а и притоа внатре биле затечени сопственикот, четири лица од персоналот, 18 гости и 11 странски државјанки од Русија и Украина, информираат од МВР.

При претресот пронајдени се и одземени парични средства сместени во посебни нумерирани кутии, мобилни телефони и техниката за видео надзор. Странските државјанки немале регулиран престој ниту дозволи за работа.

Угостителскиот објект во Охрид повторно е пломбиран и има забрана за вршење на дејност во времетраење од 30 дена, а против сопственикот ќе биде поднесена кривична пријава и за претходното кривично дело – оштетување и кинење на пломба.