Влада: Пауновски доби три дописи за неговото непостапување, имаше и усни укажувања

И денеска продолжува јавната конфронтација меѓу директорот на Државниот пазарен инспекторат Стојко Пауновски и Владата. Од Владата попладнево објавија дека Пауновски во април добил три укажувања за неговото непостапување во случајот со преземањето на рамковно вработените од Министерството за политички систем и за односи меѓу заедниците.

На Твитер профилот на портпаролот на Владата се наведени датумите кога биле испратени дописите до ДПИ од две министерства.

„Пауновски е детално информиран за неговото непостапување – ДПИ доби дописи на 5, 10 и 21 април од министерствата за политички систем и за информатичко општество и администрација. Имаше и повеќе усни укажувања. Во меѓувреме не побарал средба, не разговарал и не предложил начин на решавање на евентуалните предизвици“ – се вели во објавата.

Пауновски е детално информиран за неговото непостапување – ДПИ доби дописи на 5, 10 и 21 април од министерствата за политички систем и информатичко општество и администрација. Имаше и повеќе усни укажувања.

— Портпарол на @VladaMK (@portparolVRSM) April 25, 2021

Ова соопштение од Владата следи по изјавата на Пауновски дека не добил никакво укажување од Владата за неговото однесување.