Димитров: Ако и годинава нема поместување во евроинтеграциите, целата европска иднина на Балканот бледнее

Вицепремиерот задолжен за европски прашања Никола Димитров вели дека треба да се продолжи со разговори за наоѓање решение за спорот со Бугарија и почеток на преговори на земјава во ЕУ, во спротивно, нагласува, и двете земји и ЕУ ќе бидат губитници.

-Хрватска беше по нас, а годинава одбележува осум години членство, а ние го немаме почнато пристапниот процес. Со сите наши маани и несовршености одиме напред, тоа го покажа вчера и извештајот на Фридом Хаус. Решивме проблем што тешко се решава и ако тоа не го препознае ЕУ, па и нашите соседи, тогаш целата европска иднина на Балканот бледнее. И сѐ помалку ќе можеме да ги убедиме граѓаните дека ова е реално и остварливо и оти треба да веруваме на зборовите, на декларациите, на одлуките на земјите членки“, рече Димитров.

Затоа, додава вицепремиерот за европски прашања, мислам дека не треба да креваме раце.

-Мислам дека има посветеност во Лисабон, португалското претседателство да направи се што може и затоа мислам дека треба да правиме се да ги искористиме шансите како ќе доаѓаат. Инаку, ако одиме по избори и календарот на избори на земјите членки секогаш ќе има некаков проблем, нагласи Димитров.

Тој вели дека нема гаранции оти земјава ќе ги почне преговорите во јуни.

– Нема гаранции да бидеме реални. Не сакам ни надежта којзнае колку да ја поткревам. Мое е да го кревам влогот и да бидам што е можно поискрен и дома и надвор, рече Димитров.