Се укинуваат дозволите за полицискиот час за граѓаните што викендов ќе одат на вакцинација во Србија

Полицијата попладнево им се јавува на сите граѓани кои утринава добиле дозволи за движење за време на полицискиот час, а кои сакале викендов да одат на вакцинација против Ковид-19 во Србија, за да ги извести дека дозволите нема да важат.

Денеска до пладне МВР издавало дозволи за движење, со оглед на тоа што голем број македонски граѓани за утре наутро имаат закажано вакцинација во Белград, и невозможно е да стигнат до таму точно на време, ако не ја напуштат земјава додека трае полицискиот час, од 22 часот до 5 часот. Подоцна, Владата одлучила дека вакви дозволи не треба да се издаваат, па полицијата попладнево телефонски ги известува граѓаните дека дозволите за движење не им важат.

„Вакцинацијата ми е закажана во 8 часот, невозможно е да стигнам до Белград ако тргнам по 5 часот наутро. Дали Владата сака да ни го ограничи правото на вакцина, при уредно примена покана“, реагираат граѓаните на социјалните мрежи.

Прашања за тоа зошто е одлучено да им се укинат дозволите за движење на граѓаните кои побарале да одат во Србија за време на полицискиот час испративме до МВР, на кои чекаме одговори.

Сепак, последната владина одлука најверојатно нема да ги премисли граѓаните да заминат во Србија, со оглед на тоа што од српските здравствени власти стигна информација дека терминот за вакцинација може да се помести, дека може да се вакцинираат и лица кои воопшто немале закажано термин, па оттаму не е важно во кој дел од денот ќе пристигнат.

Српските медиуми веќе јавуваат дека пред белградскиот саем е препополно со возила со македонски и босански регистарски таблички. Оние што викендов ќе одат во Србија, ќе се вакцинираат со британската вакцина на Оксфорд, „АстраЗенека“. Ревакцината ќе биде после 3 месеци.