Бугарскиот министер за здравство: Маските треба да се задолжителни и на отворено

„Маските да станат задолжителни и на отворено“, овој предлог беше даден од главниот државен здравствен инспектор  Ангел Кунчев кој беше поддржан од министерот за здравство на Бугарија, проф. Костадин Ангелов.

Веста дојде по двочасовниот видео-разговор помеѓу бугарскиот министер, заменик-министерот Бојко Пенков, експерти од министерството за здравство и членови на стручните совети за епидемиологија и инфективни болести.

Меѓу дискутираните теми беа и времетраењето на карантинот, воведувањето на дополнителни анти-епидемиски мерки, зајакнувањето на здравствената контрола преку чести инспекции, како и за критериумите за хоспитализација на пациентите.

„За време на состаноците во земјата, колегите од сите структури ја изразуваат својата загриженост поврзана со зголемувањето на смртноста и инсистираат на построга контрола и воведување маски на отворено“, изјави бугарскиот министер.

Во извештајот на главниот здравствен инспектор во државата Ангел Кунчев, исто така, е даден предлог да се воведат маски или други средства што го покриваат носот и устата на отворено, пренесува бугарска „Нова“.