(Видео) Парис Хилтон се пофали дека доби дијамантски свршенички прстен од два милиони долари

Американската наследничка на хотелите „Хилтон“, Парис Хилтон, се пофали дека добила дијамантски свршенички прстен кој чини два милиони долари. Таа објави слики и видео од моментот кога нејзиното момче, Картер Реум, ја побара за жена на нејзиниот 40. роденден.

На својата веб-страница parishilton.com таа објави и видео како дизајнерот го црта прстенот специјално за неа. Овој модел ќе го носи нејзиното име. Масивниот дијамантски прстен се состои од главен дијамант, а околу него има десетици помали дијаманти.

„Нејзиниот веренички прстен е помеѓу 15-20 карати и е инспириран од Ајфеловата кула. Цената е скоро 2 милиони долари“, изјави Кетрин Мани, која е специјализиран продавач на дијаманстки прстени во компанијата Brilliant Earth.

„Тоа е импресивен прстен. Класичен дизајн кој ги означува минатото, сегашноста и иднината, многу убаво дизајнирано. Со врвен квалитет на дијамант, го проценувам прстенот помеѓу 1,5 до 2 милиони долари”, изјави Денис Степански, основач и сопственик на It’s Hot Diamond Jewelry and Watches.

Парис се пофали на нејзината страница, а притоа ја сподели и информацијата дека се ангажирани најдобрите експерти и занаетчии за да ѝ го направат свршеничкиот прстен, но објави и видео од дизајнот на нејзиниот скапоцен веренички прстен, рачно насликано во студиото на Жан Дусе, наследникот на Луј Картие.

„За овој специјален проект се собрани најдобрите обработувачи на дијаманти и златари“, напиша Парис на својата страница.

За потсетување, ова е четврта свршувачка на Парис Хилтон, откако се вери во 2002, 2005 и 2018 година, но ниеднаш не се омажи.