(Видео) Стојаноска: Правдата за Мијалков донесена под притисок на јавноста

Осврнувајќи се на денешната пресуда за Сашо Мијалков, од опозициската ВМРО-ДПМНЕ велат дека „го поздравуваат секој чин што значи спроведување на правда, вклучително и оваа пресуда“.

„Лошо е што поради криминалите на Мијалков во затвор заглавуваат и луѓе кои се колатерална штета. Ова е пресуда донесена под жесток притисок на јавноста, опозицијата и меѓународниот фактор. Тоа е и причината поради која навидум пропадна првата фаза од договорот Заев – Мијалков со кој удрија шамар на правдата, иако постојат индиции дека можно е апелациониот суд да одлучи и поинаку каде Заев е познато дека има силно влијание. Таа жалбена постапка ќе трае околу една ипол година“, изјави Дафина Стојаноска.

Според неа, оваа одлука околу која како што рече „власта крева еуфорија е со цел да се прикријат задкулисните договори“, и додаде дека е „чесно да се каже дека таа не е сеуште правосилна“.

Стојаноска истакна дека на осудениот Мијалков му беа овозможени услови какви што немаше ниту еден друг бегалец од правдата.

„Потсетуваме дека е потребно дополнително сериозно да се разгледаат прекршувањата на постапката. Како лице со меѓународна потерница на осуден криминалец му беше доделен куќен притвор. Какви договори и повластувања има зад сето ова. А, за кои најдобро може да сведочи Заев“, рече Стојаноска.

Додаде дека правда мора да има.