Три потврдени случаи на новиот вид коронавирус во земјава, еден починат

Британскиот вид коронавирус е детектиран уште кај двајца пациенти во земјава. Еден од нив кој имал коморбидитет починал, а другиот пациент од 26 јануари се води како оздравен, соопштија од Министерството за здравство.

Починатиот е 46-годишен маж, кој имал претходни хронични заболувања. Позитивен тест на КОВИД-19 добил на 4 јануари, а починал на 8 јануари 2021 година.

Досега кај тројца пациенти во земјава е детектиран британскиот сој коронавирус. Претходно, здравствените власти на 27 јануари објавија за првиот пациент заразен со овој вид на вирусот, кој веќе е оздравен. Вирусот беше детектиран во приватната лабораторија на клиниката „Жан Митрев“ во Скопје при анализа на примероци од јануари.

Според епидемиолошките анкети ниту еден од тројцата мажи не патувал во странство.