Двајца луѓе што ја примиле вакцината на Фајзер починале за време на тестирањето

Две лица што ја примиле вакцината на американската компанија Фајзер и нејзиниот партнер, германски Бионтек, починале за време на тестирањата на вакцината, се наведува во документ објавен на веб-страницата на американската Администрација за храна и лекови (ФДА).

Според информациите од двете компании, вкупно шест лица вклучени во тестирањето починале, но четворица од нив биле во контролната група и не ја примиле вакцината, туку плацебо.

– Има шест смртни случаи во текот на извештајниот период (двајца починати во вакцинираната група и четворица во плацебо групата), се вели во документот.

Потврдено е дека во групата која примила вакцина, еден учесник со атеросклероза и вишок на килограми починал три дена по првата доза на лекот, а друг учесник доживеал срцев удар 60 дена по втората доза и починал три дена подоцна.

Во плацебо групата, две лица починале од мозочен и срцев удар, а причината за смртта на уште двајца учесници не е утврдена. Половина од смртните случаи во сите групи биле над 55-годишна возраст.

Администрацијата за храна и лекови (ФДА) закажа состанок за 10 декември за одобрување на вакцината произведена од Фајзер и БиоНТек. Компаниите аплицираа за одобрување на 20 ноември.

Претходно беше соопштено дека американските власти очекуваат да започнат со вакцинација на своите граѓани против коронавирус на 11 или 12 декември.