Директорот на „Фајзер“: До крајот на 2021 година ќе има повеќе вакцини од потребното

Генералниот директор на компанијата „Фајзер“ Алберт Бурла апелираше на владите низ светот да не ги отвораат економиите премногу брзо поради оптимизмот од потенцијални вакцини против Ковид-19.

– Имајќи го предвид притисокот за отворање на економиите, владите не треба да направат грешка и веднаш да ги олеснат рестриктивните мерки, истакна Бурла на една онлајн конференција.

Според него, „вакцината е само едно средство за контролирање на оваа болест“, додавајќи дека „не е далеку времето кога ќе можеме да се вратиме во нормала, но дефинитивно не е сега“.

Тој истакна дека раните фази на националните програми за вакцинација веројатно ќе имаат влијание, бидејќи ќе бидат насочени кон ризичните категории, како што се возрасните луѓе и здравствените работници.

Бурла изрази уверување дека до крајот на 2021 година ќе има повеќе дози на вакцини против коронавирусот, отколку што е тоа потребно за борба против пандемијата.

– Верувам дека до крајот на 2021 година ќе имаме повеќе дози на вакцини отколку што е потребно. Правиме се што е во наша моќ да ги зголемиме производствените капацитети, но проблем е што тоа треба да го направиме во следните неколку месеци, нагласи директорот на „Фајзер“.

Компанијата „Фејзер“ минатиот месец објави дека нејзината вакцина е ефикасна околу 95 отсто. Велика Британија е прва земја во светот која ја одобри употребата на вакцината против Ковид-19, која ја развија „Фајзер“ и германската компанија „БиоНТек“.