Замрзнаа каналите во Холандија – и покрај предупредувањата граѓаните масовно се лизгаа

Каналите во Холандија по три години замрзнаа, а Холанѓаните вчерашниот ден го искористиле за лизгање на мраз.
Холандскиот премиер Марк Руте, предупреди дека треба да се избегнува масовно лизгање поради ризик од ширење на коронавирус, но и поради бројните повреди кои можат да ги оптоварат службите за итни случаи.

Сепак властите во Холандија информираат дека голем број на граѓани не ги послушале нивните апели. Во Амстердам, според последните информации од холандските медиуми, граѓаните најмногу се лизгале на замрзнатите речни канали.

Тамошните власти соопштуваат дека службите за итни трауми работеле двојно повеќе од претходниот ден.

„Беше потребно да се искористи можноста затоа што нема да има друга, можеби повеќе години“, изјави 70-годишен граѓанин. Уметничкото лизгање важи за холандска традиција и секој има подготвено пар лизгалки во случај на  замрзнување на каналите.