Масовно пријавување на Македонците за вакцинирање во Србија против Ковид-19

пред 3 години

По објавувањето на веста од страна на македонското Министерство за здравство дека евентуално мала количина вакцини против Ковид-19 во Македонија би пристигнале дури идниот месец од Астразенека, голем број граѓани аплицираат електронски за да се вакцинираат во Србија, дознава „А1он“.

Иако официјалниот став на српските власти е дека засега само лица со српско државјанство можат да се пријават и да одберат со која вакцина би сакале да бидат вакцинирани, македонските државјани се обидуваат на секој можен начин да стигнат до евентуална заштита од вирусот Ковид-19.

На електронската апликација за вакцинација во Србија, постои можност да се пријават граѓани кои се „странски државјани кои немаат престој во Србија“, па токму оваа опција ја користат Македонците. Единствениот проблем е тоа што се бара српски телефонски број, па голем број граѓани бараат помош од нивните пријатели и роднини во Србија, со цел да си ја пробаат среќата и да стигнат до вакцина.

Сепак, официјалниот став на српските власти е дека засега не се примаат Македонци без српско државјанство да се вакцинираат во српските здравствени установи и да изберат вакцина.

Во електронската српска апликација дадени се можности лицата да изберат со која вакцина сакаат да се вакцинираат, Фајзер, Модерна, Астразенека, Спутник (руска) или Синофарм (кинеска).

Српски „Блиц“ објавува дека во Србија досега се вакцинирале 4.000 странски државјани и за сите нив вакцината е бесплатна.

Првично се објавија информации дека граѓаните на Србија доаѓаат во Белград за да се вакцинираат, а потоа следуваше и веста дека хрватската писателка Ведрана Рудан се вакцинираше во Србија, што го отвори прашањето за тоа како е можно странски државјани да се вакцинираат во друга држава.

Србија го привлече вниманието бидејќи е прва во Еропа по бројот на вакцинирани граѓани на 100 жители во последната недела, а го зазеде и третото место во светот, според статистиката направена од американските владини извори преку проектот „Наш свет“ на Универзитетот во Оксфорд. Според овие податоци, пред Србија се само Израел и Обединетите Арапски Емирати.

Scroll to Top