Се шири лажна слика од писмото кое Трамп му го оставил на Бајден на масaта во Белата куќа

По вчерашната инаугурација на Џо Бајден за американски претседател, на социјалните мрежи со молскавична брзина се прошири лажна слика, а еве за што поконкретно станува збор.

Имено, традиција е претседателот во заминување да му остави на новиот претседател лично писмо на работната маса во Белата куќа. Иако Доналд Трамп прекрши многу традиции, сепак оваа ја испочитува и тој му остави лично писмо на Бајден, што вчера го потврди и новоименуваниот претседател.

Набргу откако Бајден го потврди ова, слика со лажна содржина на писмото се прошири на социјалните мрежи. На таа слика е прикажан текст од само една реченица: „Џо, знаеш дека победив“.

Но, вистинската содржината на писмото што Трамп му го оставил на Бајден не е објавена.

Иако е сосема јасно дека содржината што се појави на социјалните мрежи е монтажа, некои ја сфатија сериозно, па иранското државно радио го објави лажното писмо како вистински факт. Според Би-би-си, монтажата масовно се шири меѓу руските корисници на социјалните мрежи.

Бајден потврди дека Трамп му оставил лично писмо.

„Тој ми напиша многу великодушно писмо. Но, писмото е приватно и нема да зборувам за тоа додека не разговарам со Трамп, но тоа беше великодушно”, рече вчера Бајден.