Столтенберг: Пандемијата од Ковид-19 се користи во обид да се ослаби НАТО

Пандемијата од Ковид-19 се користи во обид да се ослаби НАТО, изјави генералниот секретар на Алијансата Јенс Столтенберг на настан организиран од Центарот за анализа на европска политика. НАТО е и ќе остане регионален сојуз, но ние ќе ја прошириме нашата работа со разни организации ширум светот во борбата против дезинформациите, тероризмот, епидемиите и заканите од вселената, додаде тој. – Сојузот е силен, со висока подготвеност за акција, со големи инвестиции во одбраната. Предпандемиските воени закани не исчезнаа, рече Столтенберг. Тој бара НАТО да може да испраќа силни пораки и истакна дека пактот неодамна остро го осуди труењето на Алексеј Навални и ја повика Москва да го испита нападот, кој не е насочен само кон една личност, туку и кон основните права. Потребна е силна меѓународна реакција на овој случај, додаде генералниот секретар. Столтенберг ја забележа растечката моќ на Кина бидејќи земјата стана лидер во технолошкиот развој и се најде на второто место во светот според воените трошоци. Тој рече дека Пекинг не се двоумел да ги искористи овие предности за да изврши притисок врз други земји. (МИА)

Извор: vecer.mk