За смртта на Марадона ќе одговара и неговата психијатарка

Аргентинските истражни органи покренаа обвинение и против психијатарката на Диего Марадона, Агустина Косачов, во рамки на истрагата за смртта на еден од најдобрите светски фудбалери во историјата.

Информацијата за аргентинските медиуми денеска ја соопшти адвокатот на Косачов, Вадим Мичанчук.

– Се води истрага против неа, што значи дека е покренато обвинение, изјави адвокатот за „Todo Notisias“.

Аргентинската фудбалска легенда посетуваше психијатар за лекување на зависноста од алкохол, а според медиумите, последната средба меѓу Косачов и Марадона била откако тој беше пуштен од болница по операцијата на субдурален хематом.

Аргентинското Обвинителство во неделата покрена обвинение и против личниот лекар на Марадона, Леополд Луке, кој се товари за убиство од небрежност.