„Имам многу пари кои морам да ги споделам“, поранешната жена на Џеф Безос донираше 6 милијарди долари

Осумнаесетата најбогата личност во светот, и косопственичка на компанијата „Амазон“, Мекензи Скот, оваа година донираше вкупно шест милијарди долари на различни непрофитни организации, а не планира тука да прекине.

Мултимилијардерката, која е поранешна сопруга на Џеф Безос, најбогатиот човек на светот, во последните четири месеци донирала повеќе од 4,2 милијарди долари на американски банки за храна и фондови за помош во итни случаи.

Оваа година Мекензи вкупно им помогнала на 380 добротворни организации, а размислува и за финансиска помош за уште 6500 вакви организации. Кога ќе се соберат сите работи, во текот на 2020 година, таа донирала околу шест милијарди долари.

„Оваа пандемија им ги уништи животите на некои Американци, кои од претходно беа во тешка состојба. Економските загуби и здравствените исходи беа тешки за жените, луѓето кои не се бели и луѓето кои живеат во сиромаштија. Во меѓувреме, значително се зголеми богатството на милијардерите. Поседувам несразмерна количина на пари кои морам да ги поделам“, напишала таа на својот блог.

Безос оваа година, донираше вкупно 10 милијарди долари за иницијативи за климатски промени. Според индексот на „Блумберг“, богатството на Безос оваа година, е зголемено за 70 милијарди долари и сега изнесува вкупно 185 милијарди долари.