Генерал Марк Мили: Не му даваме заклетва на диктатор, туку на Уставот

Највисоко рангираниот офицер во американската армија, началникот на Здружениот штаб на вооружените сили, генералот Марк Мили, синоќа испрати значајна порака откако Доналд Трамп почна со смените на функционери во Пентагон, по минатонеделниот пораз на изборите.

Како потсетување, само неколку дена по објавувањето на победата на Бајден на претседателските избори, Трамп го разреши министерот за одбрана Марк Еспер и го замени со Кристофер Милер.

Еспер јавно се дистанцираше од Трамп заради неговите идеи за задушување на протестите против расизмот и полициското насилство.

Набргу потоа оставки поднесоа водечките функционери на Пентагон: Џејмс Андерсон, одговорен за креирање на политиката на Пентагон, Џозеф Кернан, потсекретар на Министерството за одбрана за разузнавање и Џин Стјуарт, шефица на канцеларијата на секретарот за одбрана.

Генералот Мили вчера за првпат излезе во јавноста по кадровските потреси во Пентагон.

-Ние сме единствени меѓу армиите. Ние не им се заколнуваме на крал или кралица, тиранин или диктатор. Ние не се заколнуваме во една личност. Не, ние не се заколнуваме дури ни во земја, племе или религија. Се колнеме во Уставот. И секој војник претставен во овој музеј, секој морнар, авион, маринец или припадник на крајбрежната стража, секој од нас ќе го заштити и брани тој документ, без оглед на цената што тој лично мора да ја плати, рече генералот Мили во говорот на отворањето на Музејот на армијата на САД.

Оваа порака Мили ја изговори додека стоеше до новиот министер за одбрана, Кристофер Милер.