Првите резултати за присуството на варијантите на Ковид-19 во парискиот регион не се добри

Првите резултати од истражувањето во регионот на Париз, со кое се направи проценка за присуството на повеќе заразни варијанти на коронавирусот во Франција „не се добри“, посочи Реми Саломон, претседател на медицинската комисија на Париските болници и јавна помош (АП-ХП), зборувајќи за „експоненцијален раст“.

-На 7 јануари бевме приближно околу 6 отсто и минатата недела се искачивме на 15/20 отсто, објасни Реми Саломон за Франсинфо.

-Тој ќе стане доминантен, како што знаеме, во рок од 15 дена, во следните 4 недели. И бидејќи е 40-70 отсто позаразен, ќе дојде до забрзување на епидемијата ако не сториме значително повеќе. Тоа е она што нè плаши, додаде тој.

Имајќи предвид што се случува во болниците сега, тој смета дека би било разумно да се забави ширењето на вирусот, односно да се затворат училиштата можеби 3 недели, еден месец и потоа повторно да се отворат, залагајќи се само за работа од далечина.

Второто истражување наменето за проценка на присуството на позаразни варијанти на коронавирусот во Франција треба да ги даде прелиминарни резултати на почетокот на неделата.

Оваа „флеш истрага“ се состои од повторна анализа и потоа секвенционирање на голем примерок од позитивните тестови ПЦР извршени минатата среда за да се утврди дали станува збор за вообичаен вид на Sars-CoV-2 или за една од варијантите кои се појавија во последниве недели во Велика Британија, Јужна Африка и Бразил.

Првата студија од овој тип, која разгледуваше само вируси од британскиот вид, „овозможи да се процени дека варијантите се одговорни за 3,3 отсто од случаите на Ковид-19 дијагностицирани од РТ-ПЦР во Франција на 7 и 8 јануари, со хетерогено присуство на националната територија што може да варира од 0,2% во Бургоњ-Франш-Комте до 6,9 отсто во Ил-де-Франс “.

Врз основа на прелиминарните резултати од ова второ блиско истражување, министерот за здравство, Оливие Веран, посочи дека циркулацијата на англиската варијанта се интензивира „за 50 отсто секоја недела, но на помалку интензивен начин отколку во странство, каде што се зголемува од 70 до 100%“.