Руските деминери деактивирале 6.000 експлозивни уреди во Нагорно-Карабах

Руските деминери деактивирале над 6.000 експлозивни уреди и расчистиле околу 200 хектари територија во Нагорно-Карабах,вели Дмитриј Перепелкин, заменик-началник на Центарот за помирување на рускиот мировен контингент, пренесува ТАСС.

„Руските деминери на Центарот за хуманитарно деминирање расчистија 195 хектари територија и 60 километри патишта од неексплодирани мини и гранати. Откриени и уништени се повеќе од 6.000 експлозивни уреди“, рече Перепелкин.

Според него, 405 згради биле проверени и за неексплодирана убојна муниција. Тој исто така рече дека воените лекари им пружиле помош на 558 локални жители, меѓу кои 67 деца.

„Заедно со вработените во Меѓународниот комитет на Црвениот крст, продолжуваме со размената на телата на убиените меѓу ерменската и азербејџанската страна, како и со потрагата по исчезнатите лица. За да се направи оваа работа поефикасна, бројот на групите за пребарување се зголеми од три на пет“, нагласи Перепелкин.

Тој рече дека телефонската линија за собирање податоци за исчезнатите лица добила над 490 телефонски повици.

Односите меѓу двете поранешни советски републики се тензични од 1991 година, кога ерменската војска го окупира Нагорно-Карабах, меѓународно призната територија на Азербејџан и седум други соседни региони.

Кога на 27 септември избија нови судири, ерменската војска покрена напади врз цивилите и азербејџанските сили и прекрши неколку договори за хуманитарен прекин на огнот. Во текот на 44-дневните судири, Азербејџан ослободи неколку градови и речиси 300 населби и села од ерменска окупација.

На 10 ноември, двете земји потпишаа договор со посредство на Русија за ставање крај на судирите и за посветување кон сеопфатно решение. Примирјето се смета за победа на Азербејџан и пораз за Ерменија, чии вооружени сили се повлекуваат, како што е наведено во договорот.