Турција бара негативен ПЦР тест за влез во земјата, мерката на сила до март

Од понеделник патниците што ќе пристигнат на турските гранични премини и аеродроми за да влезат во земјата ќе треба да покажат негативен тест за Ковид-19, не постар од 72 часа. Мерката за задолжителен негативен тест ќе биде во сила до март.

Мерката од 30 декември се воведува и за сите патувања по копно и по море. Ако патниците не покажат негативен тест, ќе мораат да одат во карантин.

Досега за патување во Турција не беше потребен негативен тест.

Патниците кои пристигнуваат во земјата од Велика Британија, Данска и Јужна Африка ќе мора да покажат негативен тест и да бидат најмалку седум дена во карантин, додека повторно не се тестираат.

Турција е една од земјите со највисока стапка на инфекција во светот, со просек од 20.000 новозаболени дневно во последните недели. Од последици на Ковид-19 во Турција досега почина 19.371 лице.