По 25 години, албум на „Квин“ повторно прв на британската топ листа

По 25 години албум на рок-бендот „Квин“ повторно се најде на првото место на британската топ листа. Тие се овојпат први со нивниот концертен албум Live Around World. Ова е десетти албум на „Квин“ кој е на прво место во Британија, но прв со американскиот пејач Адам Ламберт кој се приклучи на бендот во 2011 година.

„Ламберт првпат настапи со Тејлор и гитаристот Брајан Меј во 2009 година, кога беше финалист за осмата сезона на „Американски идол“. Две години подоцна тие почнаа да настапуваат заедно на концерти. Оттогаш, Квин и Адам Ламберт се едни од најбараните изведувачи во светот“, пишува „Билборд“.

Албумот вклучува хитови како Don’t Stop Me Now, Radio Ga Ga, We Will Rock You и We Are The Champions, изведени на концерти ширум светот. Албумот беше објавен како благодарност до обожавателите заради откажаната турнејата во 2020 година поради пандемијата со коронавирусот.