Велика Британија формира експертска група за да се подготви за идни пандемии

Велика Британија објави дека ќе формира нова меѓународна експертска група која ќе помогне во зајакнување на глобалната подготвеност за следната пандемија и забрзување на развојот на вакцините против идните болести кога ќе се појават.

Покренато под британско претседателство со Г7, Партнерството за подготвеност за пандемија ќе им се претстави на лидерите на Г7 на самитот во јуни и ќе даде мислење за тоа како да се постигне целта на премиерот Борис Џонсон за развој на вакцина против идните болести во рок од 100 дена.

„Како претседател со Г7, Британија е решена да работи со своите партнери за да се намали ризикот од коронавирус и да се зајакне глобалната подготвеност за идните пандемии“, рече министерот за здравство Мет Ханкок пред виртуелниот дводневен состанок на групата.

„Оваа нова експертска група ќе ги насочи нашите напори во наредните години да ги заштитиме луѓето насекаде во светот од нови болести и да спасиме животи“, рече тој.

Групата ќе биде предводена од Патрик Валенс, главен научен советник во Велика Британија, а ќе вклучува директори од компании кои произведоа вакцини против Ковид-19, како и научници.

Велика Британија, исто така, најави 16 милиони фунти повеќе за финансирање на Коалицијата за иновации во подготвеноста за епидемија за поддршка на глобалното снабдување со вакцини и развој на вакцини.